Human sa gipahigayon nga State of the Nation Address (SONA) ni Presidente Ferdinand Marcos Jr. kagahapon, nagpabilin ang panawagan sa Alliance of Concerned Teachers (ACT) Northern Mindanao ug mga lokal nga ekonomista alang sa dugang pondo sa edukasyon, pagpataas sa sweldo sa mga magtutudlo, ug konkretong solusyon sa ekonomiya.
Sa pakighinabi sa Bombo Radyo Malaybalay kang Roland S. Cruz sa ACT-Northern Mindanao, iyang gipasabot nga kinahanglang hatagan og dinalian nga pagtagad ang inflation ug ang kakulang sa klasrum—diin moabot na sa 1:60 ang student-teacher ratio—lakip ang pagpataas sa entry-level nga sweldo sa mga pampublikong magtutudlo ngadto sa ₱50,000 ug pagkuha og dugang nga support staff.
Samtang sa bahin sa ekonomiya, gipahayag usab ni Ray Talimio Jr., kanhi miyembro sa Oro Chamber ug RDC-X Economic Development Committee, nga kinahanglang adunay detalyado ug pinal nga solusyon ang gobyerno batok sa 6.4% nga inflation rate ug sa ₱18.55 trillion nga utang sa nasud.
Gisuportahan usab ni Talimio ang Pax Silica initiative aron makadani og pamuhunan ug makahimo og dugang trabaho, apan nagpahinumdom kini nga kinahanglang sigurohon ang environmental safeguards, lig-ong linya sa tubig ug kuryente, ug pondo alang sa AFP modernization.