Nagplano karon ang Department of Agriculture (DA) nga magpagawas og Suggested Retail Price (SRP) nga ₱53 matag kilo alang sa lokal nga bugas aron masiguro ang patas nga presyo sa merkado.
Matud ni Agriculture Secretary Francisco Tiu Laurel Jr., nakab-ot kini nga desisyon human sa iyang pakig-istorya ug konsultasyon sa mga rice miller ug mga grupo sa industriya sa bugas diin silang tanan miuyon sa maong presyo. Giklareo hinuon sa kalihim nga kini nga SRP dili usa ka “price ceiling” o limitasyon sa presyo, kondili usa lamang ka giya alang sa mga konsumidor aron malikayan ang sobra nga pamaak sa presyo samtang gibalanse usab ang kita sa mga lokal nga mag-uuma.
Ang maong lakang sa DA migawas human magpakanaug og ₱50 nga price cap si Presidente Ferdinand Marcos Jr. alang sa mga imported nga bugas sulod sa 30 ka adlaw. Gilauman nga sunod semana hingpit nang ipatuman sa gobyerno ang maong mga kamanduan aron mahatagan og saktong panahon ang mga tigbaligya ug mamalitay sa pagpahiuyon niini.