Arestado ang usa ka lalaki nga giingong nalambigit sa ilegal nga droga human madakpan sa buy-bust operation nga gihimo sa Purok 10, Brgy. Barobo, Valencia City niadtong gabii sa Abril 21, 2026. Ang suspek giila lamang sa alyas nga “Kulot,” 26 anyos, ug residente sa maong lugar.
Ang operasyon gipahigayon sa mga operatiba sa Philippine National Police – Valencia City Police Station uban ang Philippine Drug Enforcement Agency (PDEA) Bukidnon, kauban ang ubang yunit sama sa CADSUT, Provincial Intelligence Unit (PIU), RPDEU-10, 1003rd Maneuver Company sa RMFB-10, ug 2nd Bukidnon PMFC.
Narekober gikan sa suspek ang gibanabana nga 4.2 gramos sa gidudahang shabu nga adunay kantidad nga ₱28,560 base sa Standard Drug Price.
Apil sa mga ebidensya ang tulo ka sachet sa gidudahang droga, usa ka ₱1,000 bill nga gigamit isip marked money, usa ka plastic nga sudlanan, ug usa ka cellphone.
Sa pagkakaron, gipabilin ang suspek sa kustodiya sa Valencia City Police Station ubos sa Philippine National Police Bukidnon Provincial Police Office samtang giandam ang angay nga mga kaso batok kaniya.