Lalaki, nakit-an nga walay kinabuhi sa usa ka payag sa Can-ayan, Malaybalay City

Usa ka 32-anyos nga lalaki ang nakit-an nga walay kinabuhi sulod sa usa ka payag sa Purok 1, Can-ayan, Malaybalay City niadtong Hunyo 17.

Sumala sa inisyal nga imbestigasyon sa Malaybalay City Police Station, giingong nakainom ang biktima og insecticide base sa nakaplagang maong kemikal duol sa iyang lawas.

Matod sa pamilya, kataposang nakita ang lalaki mga alas 5:00 sa buntag niadtong Hunyo 16 dapit sa barangay road duol sa ilang panimalay.

Human kini wala makapauli, gipangita siya sa iyang pamilya hangtod nga nakit-an siyang walay kinabuhi sa iyang payag.

Padayon pa ang imbestigasyon sa mga awtoridad aron matino ang tibuok detalye sa nahitabong insidente.