14 patay sa Israeli strikes sa Lebanon, hulga sa ceasefire gikabalak-an

Misaka na sa 14 ang ihap sa mga nakalas samtang 37 ang angol sa labing bag-o nga airstrikes sa Israel didto sa Lebanon, sumala sa health ministry sa nasod.

Lakip sa mga biktima ang duha ka bata ug duha ka babaye, samtang usa usab ka sundalong Israeli ang gikatahong namatay sa maong hitabo.

Nagpagawas na og pasidaan ang militar sa Israel ngadto sa mga residente nga mobakwit gikan sa pipila ka lungsod, dungan sa pagpasalig nga ang ilang operasyon nakapunting lamang sa mga manggugubat ug armas sa Hezbollah tungod sa giingong paglapas niini sa ceasefire.

Isip tubag, nideklarar usab ang Hezbollah nga magpadayon ang ilang mga pag-atake hangtod dili mohunong ang operasyon sa Israel sulod sa ilang teritoryo.