Giawhag sa legal ug labor expert nga si Atty. Jose Sonny “Nono” Matula ang mga mamumuo sa Bukidnon ug sa tibuok Mindanao nga maghiusa ug magtukod og unyon o samahan sa ilang mga opisina ug pabrika.
Gipasabot ni Matula nga imbes nga maghulat lang sa lihok sa gobyerno, ang pagbaton og unyon naghatag og mas kusgan nga tingog ug gahum sa mga mamumuo sa pakigsabot sa ilang mga amo (bargaining power) aron mapataas ang ilang sweldo ug mapatuman ang mas maayong kondisyon ug benepisyo sa trabahoan.
Dugang pa ni Matula, padayon ug walay pahuway ang ilang pagduso sa ₱200 across-the-board wage hike hangtod nga makab-ot ang living wage—o ang sweldo nga sakto ug makabuhi gayud sa pamilya subay sa gipanalipdan sa Konstitusyon.
Gipaklaro usab sa abogado ang katungod sa mga mamumuo sa permanenteng pagpanrabaho (security of tenure). Unom (6) ka bulan lamang ang gitugot sa balaod alang sa pagpauyon-uyon o probationary period. Apan kon ang trabaho kinahanglanon kaayo sa kumpanya, giisip na kining regular sa unang adlaw pa lang kon walay gipirmahang kontrata. Alang sa mga trabahante nga wala sa kinauyokan nga negosyo—sama sa hardinero o karpintero sa pabrika—mahimo gihapon silang regular kon makatigum na og usa ka tuig nga serbisyo.