MALAYBALAY CITY, BUKIDNON — Nahilakip sa selda ang tulo ka gitudlong street-level drug personalities human gipahigayon ang sunod-sunod nga buy-bust operations sa mga lungsod sa Don Carlos, Kitaotao, ug sa dakbayan sa Valencia niadtong Hulyo 31.
Subay sa taho ni Bukidnon Police Provincial Office (BukPPO) Director PCOL Oliver Sotto Navales, gipahigayon ang maong mga operasyon sa pakigtambayayong sa mga lokal nga Drug Enforcement Units, Provincial Intelligence Unit, ug Regional Mobile Force Battalion 10.
Gikilala ang mga nadakpan nga sila si alyas “JR”, 32 anyos, nga nasikop sa Valencia City; alyas “Balan”, 34 anyos, sa Don Carlos; ug alyas “Longky”, 31 anyos, sa Kitaotao.
Narekober gikan sa tulo ang gituohang shabu nga adunay kinatibuk-ang gibug-aton nga 7.2 gramos ug nagkantidad og ₱48,960, lakip na ang buy-bust money ug pipila ka gamit sa pag-gamit og droga. Kasamtangang naa sa selda sa tagsa-tagsa ka municipal ug city police stations ang mga suspek samtang giandam na ang kasong paglapas sa Republic Act 9165 o Comprehensive Dangerous Drugs Act of 2002.