Gibasura na sa Supreme Court (SC) En Banc sa hingpit ang motion for reconsideration nga giduso sa Kamara. Tumong sa maong mosyon nga balihon ang desisyon sa korte niadtong Hulyo 25, 2025, nga nagdeklarang “unconstitutional” o supak sa Batakang Balaod ang Articles of Impeachment batok ni Bise Presidente Sara Duterte.
Sa desisyon sa Korte Suprema, gihatagan og gibug-aton nga ang ika-upat nga reklamo sa impeachment nga gipadala sa Senado niadtong Pebrero 5, 2025, lapas na sa gitugot sa Konstitusyon. Ubos sa Article XI, Section 3(5), gidid-an ang pagpasaka og labaw sa usa ka reklamo sa impeachment batok sa samang opisyal sulod sa usa ka tuig .
Giklaro usab sa korte nga ang “due process” o makiangayong proseso kinahanglan gihapong sundon bisan sa impeachment proceedings. Tungod sa maong desisyon, hingpit nang natuldokan ang maong kaso ug dili na modawat ang korte og bisan unsa pang dugang nga hangyo o “pleadings” bahin niini. Hinuon, giklaro sa Korte Suprema nga mahimo ra gihapong mopasaka og bag-ong reklamo batok sa Bise Presidente sugod sa Pebrero 6, 2026.