Mikunhod ang kita sa Land Transportation Office (LTO) kini gumikan sa pagpatuman sa 10-year validity period sa mga driver’s license.Tungod kay mas taas na ang panahon sa mag-renew ang mga driver.
Sa exclusibong pakighinabi sa Bombo Radyo Philippines kay Land Transportation Office (LTO) Region X Director Nelson S. Manaloto nga dili na daghan ang moadto sa ilang buhatan kon itandi kaniadto nga tulo ka tuig lang ang limitasyon sa lisensya. Bisan pa niini, nagpabiling lig-on ang kita sa LTO-X sa bahin sa rehistrasyon sa mga sakyanan tungod kay ginahimo man kini matag tuig.
Dugang pa niini, hapit na mahurot og apod-apod ang mga backlog sa mga plaka sa sakyanan sa tibuok rehiyon. Gidasig usab ni Manaloto ang mga tag-iya og sakyanan nga wala pa makakuha sa ilang mga plaka sa pagbisita sa ilang mga buhatan sanglit andam na kini alang sa distribusyon.
Sa laing bahin, mahitungod sa mga electric vehicles giklaro ni Manaloto nga wala pa sila mangdakop niini sa rehiyon sanglit anaa pa kini sa pilot testing didto sa National Capital Region (NCR).
Gitugotan pa ang pag-agi niini sa mga national highway sa probinsya basta anaa lamang sa outermost lane o shoulder sa dalan aron malikay sa disgrasya, ilabi na nga kulang pa ang mga alternate routes sa rehiyon.
Sa katapusan, mipahinumdom si Manaloto sa mga drayber nga bisan wala na mangumpiska og lisensya ang LTO sa mga nakalapas sa balaod, kinahanglan gihapon kining bayran sulod sa 15 ka adlaw. Ang mapakyas sa pagbayad sa multa mahimong mag-atubang og suspensyon sa pagmaneho.