Gibira lamang pinaagi sa pisi sa mga boluntaryo sa Japan ang usa ka kastilyo nga mokabat og 360 ka tonelada isip kabahin sa pagpreserba sa makasaysayanong istruktura.
Mukabat sa 1,800 ka tawo ang mitambong sa pagbalhin sa Hirosaki Castle sa Aomori Prefecture, diin nagpulihanay ang mga grupo sa pagbira sa 30-metros nga pisi nga konektado sa kastilyo.
Kapin duha ka metros ang gilay-on nga nahimo sa pagbalhin sa kastilyo sulod sa duha ka adlaw gamit ang tradisyonal nga pamaagi nga gitawag og “hikiya.”
Gibutang ang building sa mga riles ug rollers aron hinay-hinay kining mabalhin nga dili bungkagon.
Gibalhin ang kastilyo niadtong 2015 aron mahatagan og luna ang pag-ayo sa bato nga pader nga nadaot tungod sa kusog nga linog, ug nahuman ang pag-ayo niini niadtong 2024.
Nahuman na sa katapusan sa Agosto ang manual nga pagbira sa kastilyo, diin mikabat sa 4,100 ka tawo ang natalang miapil sa pagbalhin niini og lima ka metros.
Mga makina na ang mogamit sa nahibiling bahin sa pagbalik sa kastilyo sa orihinal nga pwesto.