Giimbistigahan karon sa kapulisan ang upat ka persons of interest nga nalambigit sa brutal nga pagpatay sa magtiayon nga gipangtigbas sulod sa ilang balay sa Purok 7, Barangay Kaatuan, Lantapan, Bukidnon.
Sa eksklusibong pakighinabi sa Bombo Radyo Malaybalay kay PMSG. Jeroen Pulido, investigator sa Lantapan Municipal Police Station, mipahayag nga base sa ilang imbestigasyon, samtang nangatulog ang mga biktima, misulod ang mga suspetsado sa ilang balay ug mitigbas sa magtiayon gamit ang sundang.
Ang biktimang lalaki giila nga si Condrado, 66 anyos, nakaangkon og samad sa likod nga bahin sa liog, duha ka samad sa tiyan, sa wala nga tuhod ug wala nga kamot. Ang iyang asawa nga si Catherine Alejan, 68 anyos, adunay samad sa likod ug tiyan. Human sa krimen, ang mga suspek misibat paingon sa wala pa matino nga direksyon.
Narekober sa crime scene ang usa ka sundang nga gibana-banang 30 pulgada ang gitas-on lakip na ang kuptanan, nga posible gigamit sa krimen.Gipadayag usab ni Pulido nga usa sa mga anggulo nga gitutukan mao ang posible nga panagbangi sa yuta nga gitikad sa magtiayon ug kaila lang matud pa sa mga biktima ang mga suspetsado. Samtang kasamtangan nagpadayon ang imbestigasyon sa kapulisan.