Kapin P402-K nga smuggled nga sigarilyo, nasakmit sa checkpoint operation sa kapulisan

Nabawi sa mga otoridad ang smuggled nga mga sigarilyo nga nagkantidad og P402,169 atol sa checkpoint operation sa Mulondo, Lanao del Sur niadtong Hulyo 18.

Base sa report, namatikdan sa mga otoridad ang usa ka giabandonang mini van human mokalagiw ang drayber ug ang iyang mga kauban, nga gituohang nahadlok nga madakpan.

Sa inspeksyon, nadiskubrehan sa kapulisan ang 470 reams sa smuggled nga Green Canon Menthol cigarettes nga walay igong dokumento ug wala usab mosunod sa Graphic Health Warnings.

Sa pagkakaron, gipadayon sa mga otoridad ang hot pursuit operation aron mailhan ug madakpan ang mga responsable sa maong iligal nga kalihukan.