Gibutyag sa sekto sa transportasyon nga gamay lamang ang nahimong epekto sa bag-ong usbaw sa pletihan sa kita sa mga drayber sa Bukidnon tungod sa padayon nga kamahal sa gasolina ug uban pang gasto sa operasyon. Sa pakighinabi sa Bombo Radyo, gipahayag ni Arlene C. Gantalao, chairperson sa Northern Bukidnon Transport Service Cooperative o NOBSCO ug Northern Mindanao Federation of Transport Cooperatives, nga bisan adunay nadugang sa pletihan, dili pa kini igo aron makatubag sa panginahanglan sa mga drayber ug mga operator.
Sa bag-ong pletihan gikan sa Malaybalay City, ₱75 ang regular fare sa modern bus paingon sa Valencia ug ₱60 alang sa senior citizens, PWD ug estudyante, samtang ₱62 ang regular fare sa multicab ug ₱50 alang sa discounted fare. Samtang, ₱135 ang regular fare gikan Malaybalay paingon sa Maramag ug ₱108 ang discounted fare, samtang ₱195 ang regular fare paingon sa Kibawe ug ₱156 ang discounted fare. Â
Gipasabot usab ni Gantalao nga usa sa mga hagit sa implementasyon mao ang pagpahiangay sa mga pasahero nga wala pa masayod sa bag-ong pletihan.
Tungod niini, padayon ang panawagan sa transport sector sa gobyerno alang sa fuel assistance ug dugang nga pondo alang sa sektor sa transportasyon sa 2027.