Misaka na sa 3,860 ang kinatibuk-ang gidaghanon sa mga aftershocks nga natala human sa Magnitude 7.8 Offshore Sarangani Earthquake nga miigo sa Mindanao niadtong Hunyo 8, 2026, sumala sa pinakabag-ong report sa Philippine Institute of Volcanology and Seismology (PHIVOLCS) hangtod alas-9:00 sa buntag karong adlawa.
Sa maong gidaghanon, 966 ka aftershocks ang na-plot sa mga eksperto samtang 64 niini ang gibati sa publiko. Ang kusog sa mga aftershocks naglangkob gikan sa magnitude 1.2 hangtod 6.4, nga nagpakita nga padayon gihapon ang seismic activity ilawom sa dagat sa maong lugar.
Bisan pa niini, nagpabiling alerto ang mga ahensya sa gobyerno ug nagpadayon sa ilang pagmonitor aron masiguro ang kaluwasan sa mga residente sa mga lugar nga naapektuhan sa linog.
Ang linog sa Sarangani gikonsiderar nga usa sa labing kusog nga natala sa Mindanao sulod sa miaging mga tuig.
Nagbilin kini og kadaot sa mga imprastraktura ug nakapahinabo sa pagkaguba sa pipila ka mga karsada sa rehiyon.
Matud pa sa PHIVOLCS, gilauman pa nga magpadayon ang pagtungha sa mga aftershocks sulod sa mosunod nga mga adlaw tungod sa kusog sa nahitabong linog.
Samtang nagpadayon ang mga aftershocks, gipadayon usab ang relief operations sa mga probinsya sa Davao Occidental ug Sarangani, ingon man sa General Santos City, diin adunay mga kabalayan nga nadaot ug mga lugar nga nakasinati og pagkawala sa suplay sa kuryente.
Sa laing bahin, gikumpirma sa National Disaster Risk Reduction and Management Council (NDRRMC) nga kapin sa 12,000 ka mga residente ang temporaryong gipapahawa gikan sa ilang mga panimalay ug gipapuyo sa mga evacuation center isip kabahin sa mga lakang sa kaluwasan.