Gitawag sa beteranong abogada nga si Atty. Lorna Kapunan nga usa ka “payback time” o pagbawi sa serbisyo ngadto sa nasud ang pag-apil niini isip usa sa mga pribadong prosekutor nga mogukod sa kasong impeachment batok kang Vice President Sara Duterte.
Si Kapunan mao ang manguna sa napulo ka mga de-kalibre nga private prosecutors gikan sa tulo ka dagkong law firm sa nasud alang sa maong impeachment trial. Atol sa iyang pamahayag, midadangat ug mikuwestiyon usab ang abogada sa dagan sa hustisya sa nasud.
Gihisgutan niini kon nganong adunay usa ka principal o ordinaryong tawo nga napriso og 11 ka tuig tungod lang sa lima ka libo ka pesos, samtang ang usa ka bise presidente dili matangtang sa puwesto taliwala sa mga pasangil nga naggamit kini sa sayop nga pamaagi sa minilyon nga pondo sa gobyerno.
Kahinumduman nga gipanganlan na sa House prosecution panel ang unang batch sa mga pribadong abogado nga maoy motabang sa paggukod ug pag-usig sa kasong impeachment batok kang Vice President Sara Duterte.
Matud pa ni Lead Public Prosecutor ug Batangas Representative Gerville “Jolo” Luistro, makigtambayayong kining maong mga pribadong abogado sa mga House prosecutors aron planohon ug pangandaman ang tanang aspeto sa trial.
Lakip niini ang pagpresentar sa mga ebidensya, pagkuha og mga testigo, ug ang paghimo og mga legal pleadings batok sa bise presidente.