Mibusikad ang duha ka dako nga forest fire sa Iwate Prefecture, Japan nga nagsugod niadtong Miyerkules ug midako pa hangtod niabot na og 1,176 ektarya ang apektadong lugar hangtod Biyernes sa buntag (local time), hinungdan sa pagbakwit sa kapin 1,000 ka residente.
Nagsugod ang unang sunog sa Kozuchi district sa Otsuchi town , ug paspas kining mikaylap nga nakaapekto sa pipila ka mga building ug sa kasikbit nga kakahoyan.
Milabay ang pila ka oras human niini, laing sunog usab ang miulbo sa kabukirang bahin sa Kirikiri district nga mga 10 kilometro ang gilay-on gikan sa unang insidente, nga nagdugang sa kahadlok sa mga residente.
Tungod sa risgo, kapin 566 ka kabalayan ang giabisohan nga mobakwit, ilabi na kadtong duol sa ikaduhang sunog nga lugar.
Sa karon, wala pa’y nataho nga namatay o nasamdan.
Gipahimangnoan na sa weather observatory ang lugar bahin sa uga nga hangin ug kusog nga hangin nga posibleng nakapadako sa kalayo.
Usa ka 61-anyos nga residente ang nalikay uban sa iyang pamilya ug nagbutyag nga duha ka sunod ang natigayon sa managlahing lugar.
Gipadayag usab niini ang iyang kabalaka sa kahimtang sa ilang panimalay.