Giduso sa House of Representatives of the Philippines ang usa ka sugyot balaodnon nga nagtinguha nga mapugngan ang kalit-kalit nga pagsaka sa presyo sa produktong petrolyo.
Sa ilawom sa House Bill 8839 o “Fuel Price Stabilization and Energy Security Act” nga gi-file ni Manila Rep. Joel Chua, hatagan og gahum ang gobyerno sa pag-intervene sa presyo ug suplay sa lana sa lokal nga merkado.
Lahi kini sa kasamtangang sistema ilawom sa Oil Deregulation Law, diin ang mga kompanya sa lana lamang ang nagtakda sa presyo base sa kalibutanong merkado.
Nakasulat sa sugyot ang pag-establisar sa Oil Price Stabilization Fund ug Strategic Petroleum Reserve, nga magsilbing imbakan sa baraton lana kung ubos ang presyo sa kalibutanong merkado, ug ipagawas lang kini kung adunay krisis.
Sumala ni Chua, pinaagi niini nga sistema, malikayan ang panic buying ug masiguro ang igo nga suplay sa lana bisan pa sa mga kalit nga kalibutanong kagubot.