Iro, misalmot sa usa  ka mini-marathon sa Indianapolis

Nakadani og atensyon ang usa ka abtik ug malipayon nga iro human kini mikuyog sa dagan sa mga partisipante sa usa ka mini-marathon nga gihimo sa Indianapolis.

Sumala sa gipatik sa Indianapolis Police Department sa ilang social media page, nakita sa mga pulis nga nagbantay sa 500 Festival Mini-Marathon ang maong iro nga kalit lang misabay sa dagan sa mga runners.

Ang panghitabo narekord usab sa ilang body camera.

Human sa kalihukan, gidala ang iro sa Indianapolis Animal Care Services aron maatiman ug mabantayan samtang gipangita ang tinuod nga mga tag-iya niini.

Kon walay motungha aron moangkon sa iro sulod sa gitakdang panahon, kini mahimong ipasagop ngadto sa usa ka bag-ong pamilya nga andam moatiman niini.