Iran ug Gulf countries, magpulong bahin sa seguridad sa Strait of Hormuz

Nakatakdang magpulong ang Iran ug mga silingang nasod sa Gulf sa Oman sugod Lunes aron hisgutan ang seguridad ug sitwasyon sa Strait of Hormuz, usa sa labing estratehikong agianan sa mga barko sa kalibotan.

Sumala sa Iranian Foreign Ministry, tumong sa tigom nga palig-onon ang relasyon tali sa mga nasod ug masiguro ang luwas ug hapsay nga paglawig sa maong agianan.

Naapektuhan ang pag-agos sa lana human sa serye sa mga pag-atake ug tensyon tali sa Estados Unidos, Israel ug Iran, nga mitukmod sa presyo sa lana ngadto sa kapin 100 dolyar matag baril.

Gipasiugda sa Tehran nga ang mga isyung pangrehiyon mas angay sulbaron sa mga nasod mismo sa Middle East, lakip ang mga miyembro sa Gulf Cooperation Council ug Iraq.