Pormal nang gitapos sa Iglesia ni Cristo (INC) ang ilang tulo ka adlaw nga rally, sumala sa gipahibalo sa ilang tigpamaba nga si Edwil Zabala kagahapong Huwebes, Hulyo 2.
Sa video message niini, nagpasalamat si Zabala sa tanang mitambong, mga personalidad nga misuporta, ug mga pulis nga mitabang sa pagsiguro sa kalinaw ug kahapsay sa maong kalihukan.
Matod ni Zabala, tin-aw nilang napadayag ang ilang mensahe ngadto sa mga hingtungdan nga opisyal ug naglaom sila nga mopatigbabaw ang hustisya sa nasud, dili ang pagbaliko sa balaod alang sa personal nga interes.
Ang unang duha ka adlaw sa rally gihimo sa People Power Monument sa EDSA sa Quezon City, samtang ang katapusang adlaw gibalhin sa Liwasang Bonifacio sa Maynila human bawion sa lokal nga kagamhanan sa Quezon City ang permit sa maong lugar.
Kahinumduman nga gisugdan sa INC ang kalit nga rally aron ipakita ang suporta kang Senador Rodante Marcoleta, nga giandam og kasong plunder sa Office of the Ombudsman.
Gisaway usab sa grupo ang ilang gitawag nga “selective justice” ug “distortion of law” may kalabotan sa kaso sa senador.
Sumala ni PMaj. Philipp Ines sa Manila Police District, miabot sa kapin 82,000 ang peak nga gidaghanon sa mga mitambong sa katapusang adlaw sa rally sa Liwasang Bonifacio, ug nahuman ang tibuok kalihukan nga malinawon.