Gilauman nga mosaka sa 5.7 milyon ka metric tons ang importasyon sa bugas sa Pilipinas karong tuiga, sumala sa US Department of Agriculture (USDA).
Kini tungod sa gipaabot nga pagkunhod sa lokal nga produksiyon sa humay.
Misaka ang forecast sa USDA gikan sa 5.6 milyon ngadto sa 5.7 milyon ka metric tons.
Samtang, 4.8 milyon ka metric tons lamang ang forecast sa Department of Agriculture. Usa sa mga hinungdan sa pagkunhod sa ani mao ang pagsaka sa presyo sa abono ug ubang farm inputs.
Nakadugang usab ang ubos nga lebel sa tubig sa mga dam nga gigamit sa irigasyon.
Nagpasidaan ang DA nga mahimo pang moubos ang produksyon kon moigo ang kusog nga El Niño.
Bisan adunay suporta gikan sa gobyerno, giingong dili pa kini igo aron mapagaan ang bug-at nga galastuon sa mga mag-uuma.