Sports car nga gama sa 328,000 ka piraso sa Lego, nakatala og bag-ong speed record

Nakatala og bag-ong world record ang usa ka sports car nga hinimo gikan sa 328,000 ka piraso sa LEGO human kini nakaabot sa gikusgon nga 111 km/h (69 mph).

Kini nga realistic copy sa Koenigsegg Jesko Attack, nga gilangkuban sa 327,906 ka piraso sa LEGO Technic, malampusong milupig sa miaging rekord nga 50 km/h.

Isip kabahin sa selebrasyon sa pagpagawas sa ilang bag-ong LEGO set, ang professional driver sa Koenigsegg nga si Markus Lundh mismo ang nagmaneho sa maong sakyanan sa sikat nga Goodwood hillclimb circuit.

Sumala sa lead designer sa LEGO nga si Lubor Zelinka, mokabat sa 9,400 ka oras o kapin sa usa ka tuig ang gikinahanglan aron makompleto ang maong proyekto, nga giisip nila nga ilang pinakakomplikado nga nahimo hangtud karon.