Gitugyan na sa International Criminal Court kon ICC prosecutors ngadto sa defense team ni kanhing Presidente Rodrigo Duterte ang dul-an nga 7,000 ka piraso sa ebidensiya una pa ang gikatakdang pagdungog sa Nobyembre 30.
Base sa notification sa prosecution bahin sa disclosure of evidence gikan Enero 7 hangtod Hulyo 31, mokabat sa 6,909 ka items of evidence ang gihatag ngadto sa legal team ni Duterte, diin kadaghanan niini mahimong susihon ug usisahon sa depensa.
Sa maong gidaghanon, 4,573 ang gikategorya isip Rule 77 evidence o tangible evidence nga mahimong inspeksiyunon sa defense team.
Aduna usab 2,279 ka incriminating evidence o mga ebidensiyang mahimong mag- akusar kang Duterte kalabot sa mga pagpatay nga giingong nahitabo atol sa kampanya batok iligal nga droga.
Lakip niini ang mga dokumento bahin sa operasyon sa mga barangay, mga high-value targets ug ang Davao Death Squad kon DDS.
Samtang, ang nahibiling 57 ka ebidensiya giklasipikar isip potentially exonerating evidence o mga impormasyon nga mahimong pabor sa depensa, makapaluya sa kredibilidad sa mga saksi, o makatabang sa ilang posibleng depensa sa kaso.