THE HAGUE, Netherlands – Gihingusgan karon sa International Criminal Court (ICC) ang kaso batok kang kanhi Presidente Rodrigo Duterte human pormal nga gipahibalo ang pagtukod sa usa ka “Trial Chamber” nga maoy modumala sa sunod nga hugna sa iyang kaso.
Sumala sa taho, ang maong Trial Chamber III langkuban sa tulo ka mga huwes: silang Judge Joanna Korner (United Kingdom), Judge Keebong Paek (Republic of Korea), ug Judge Nicolas Guillou (France). Kini human kumpirmasaha sa Pre-Trial Chamber I ang tanang sumangil batok kang Duterte may kalabutan sa “crimes against humanity” tungod sa iyang kampanya batok sa illegal nga droga.
Ang buluhaton sa maong bag-ong chamber mao ang pag-iskedyul sa pormal nga husay, pagdawat sa mga ebidensya, ug ang paghatag sa pinal nga desisyon kon sad-an ba o dili ang kanhi presidente. Gilauman usab nga magpabilin sa kustodiya sa ICC sa The Hague si Duterte samtang nagpadayon ang mga proseso.
Bisan pa sa paningkamot sa depensa nga babagan ang hurisdiksyon sa korte, gibasura kini sa Appeals Chamber, butang nga naghatag og dalan aron hingpit nga sugdan ang trial phase.