Target sa House Prosecution Panel nga ablihan ang mga bank account ni Vice President Sara Duterte sa higayon nga magsugod na ang impeachment trial sa Senado.
Matud ni House Lead Prosecutor ug Batangas 2nd District Representative Gerville Luistro, lakip sa mga ebidensya nga ilang ipresentar sa Senate trial, nga wala pa naipakita sa clarificatory hearing sa Kamara diin mao ang mga dokumento gikan sa mga bangko ug testimonya sa mga opisyal niini.
Gipasabot ni Luistro nga sa una nag-amping ug konserbatibo sila sa ilang lakang tungod sa strikto nga confidentiality ubos sa Bank Secrecy Law.
Apan gipasiugda sa kongresista nga adunay mga exemption ang maong balaod nga nagtugot sa pag-abli sa bank records, ilabina sa mga kaso sa impeachment.
Lakip usab sa mga exemption ang sinulat nga pagtugot sa depositor, order sa korte sa mga kaso sa bribery o dereliction of duty sa mga opisyal sa gobyerno, ug kung ang kwarta nga gi-deposito mao mismo ang subject sa reklamo.
Gisiguro ni Luistro nga magpasaka sila og mosyon sa impeachment court aron mag-isyu og subpoena batok sa mga opisyal sa bangko ug para sa pagsumite sa mga kinahanglan nga dokumento.
Positibo usab ang komite nga aprobahan sa Senado ang ilang hangyo.
Nagtuo ang House Committee on Justice nga dili na ni mahimong hinungdan sa taas nga diskusyon ang pag-abli sa bank accounts kay kabahin kini sa opisyal nga impeachment trial.
Samtang, mipahimangno ang defense team ni VP Sara nga dili sa una pa sila mohatag og pahayag samtang wala pa magsugod ang pormal nga pagdungog sa Senado.