Nakatakdang magpagawas og subpoena ang National Bureau of Investigation batok kang Nancy dela Rosa, asawa ni Senador Ronald “Bato” dela Rosa, may kalabotan sa mga pamahayag niini bahin sa insidente sa Senado niadtong Mayo 13.
Gikumpirma ni NBI Director Atty. Melvin Matibag atol sa press conference nga giandam na sa ahensya ang subpoena human malambigit si Nancy dela Rosa sa giingong mga pamhayag nga gipa-abot kang Senate President Alan Peter Cayetano.
Matud sa NBI, giingong gigamit ni Senador dela Rosa ang maong insidente isip higayon aron makagawas sa Senado.
Gawas kang Nancy dela Rosa, sigon usab si Matibag nga magpagawas pa ang NBI og subpoena batok sa uban pang mga indibidwal nga giingong nakigkomunikar kang Senador dela Rosa atol sa imbestigasyon.
Samtang, gikonsidera sa Department of the Interior and Local Government (DILG) ang pagbutang og pabuya o tanyag sa ulo ni Senador Ronald dela Rosa aron siya madakpan.
Karon, wanted sa International Criminal Court (ICC) ang kanhi hepe sa Philippine National Police (PNP) tungod sa iyang giingong papel sa madugo nga war on drugs sa ilawom sa administrasyon ni Duterte.
Sa ikaduhang semana sa pagpangita sa mga otoridad sa nagatago nga senador, sigon ni DILG Secretary Remulla nga posible nilang hatagan og pabuya aron mas mapadali ang pagdakop kaniya.
Dugang pa usab sa kalihim nga sa karon dili pa kini epektibo, ug ginatun-an pa sa ahensya kung unsay angay buhaton.