Padayon ang pre-trial conference sa impeachment case batok kang Vice President Sara Duterte sa Senado, diin gisumite sa House Prosecution Panel ang ilang plano sa presentasyon sa mga ebidensya alang sa nagkadaiyang Articles of Impeachment.
Sumala kang House trial spokesperson Representative Zia Alonto Adiong, una nilang ipresentar ang mga ebidensya may kalabotan sa giingong assassination plot, grave threats ug inciting to sedition, sunod ang alegasyon sa sayop nga paggamit sa confidential funds, bribery ug corruption sa Department of Education, ug sa katapusan ang mga isyu sa unexplained wealth, false statements ug padayong business interests.
Samtang, mihangyo usab ang prosekusyon sa impeachment court nga klaruhon sa depensa ang katuyoan ug kalabutan sa ilang mga testigo tungod kay limitado lamang sa general denials ang ilang gihisgutan sa pre-trial brief.
Matud sa House prosecutors, makatabang kini aron sa paspas nga proseso ug malikayan ang mga paglangan sa pagdungog.
Gipasiugda usab sa kampo sa prosekusyon nga andam sila sa pagpresentar og lig-on ug bug-at nga mga ebidensya aron suportahan ang ilang kaso.
Samtang, gibilin nila sa mga senator-judges ang katapusang paghusay sa impeachment trial, subay sa mandato sa Konstitusyon.