Gikataw-an lamang ni House Lead Prosecutor Gerville Luistro ang mikaylap nga impormasyon nga giingong “gilamon siyang buhi” sa depensa ni Bise Presidente Sara Duterte atol sa unang pre-trial conference.
Matud ni Luistro, walay kamatuoran ang maong impormasyon ug gihimo lamang kini aron sa pagpahisalaag sa publiko.
Dugnag pa ni Luistro, nga bisan sa wala pa magsugod ang conference, nagdahom na ang prosecution team nga mosamot ang kalihokan sa social media ug modaghan ang pagpakaylap sa giingong “fake news,” busa wala na siya matingala sa maong mga post.
Una nga mikaylap sa social media ang alegasyon nga napilde siya sa depensa ni VP Sara pinaagi sa mga online post sa mga supporter sa Bise Presidente.
Apan, hugot nga gipanghimakak sa prosecution panel ang maong mga pamahayag.
Matud nila, ang kasagarang gihimo sa pre-trial conference mao lamang ang presentasyon ug pagmarka sa mga ebidensya, ug wala pa mahitabo ang mga debate o argumento sa duha ka kampo.
Ubos sa pre-trial conference, gihisgutan sa prosecution ug depensa ang mga procedural matters ug pagmarka sa mga ebidensya isip pagpangandam sa pormal nga impeachment trial nga gikatakdang magsugod sa Hulyo 6.