House prosecution, nanawagan sa publiko nga dili hukman ang impeachment trial base lamang sa survey

Nanawagan ang House Prosecution Team sa publiko nga dili una mohatag og konklusyon o paghukom sa impeachment trial batok kang Vice President Sara Duterte base lamang sa mga survey o opinyon sa katawhan.

Matud ni Atty. Benjamin J. Tolosa Jr., legal spokesperson sa House prosecutors, ang impeachment usa ka konstitusyonal nga proseso sa pagpanubag ug dili usa ka sukdanan sa pagkapopular.

Gipahinumdoman usab ni Tolosa ang impeachment trial niadtong 2012 batok kang Renato Corona, diin matud niya nabag-o ang panan-aw sa publiko human mapresentar ang mga ebidensya.

Busa, giawhag niini ang publiko nga subayon ang mga pagdungog ug paminawon ang ebidensya gikan sa duha ka panig sa dili pa maghimo og kaugalingong opinyon sa maong kaso.