Mopahigayon ang unang Olympic gold medalist sa nasod nga si Hidilyn Diaz og usa ka world-class weightlifting competition nga ipahigayon sa Dakbayan sa Makati sa sunod nga bulan.
Ang maong torneo nga giulohan og “HD LiftOff” opisyal nga mahitabo karong Agosto 15 hangtod 16, nga pangunahan ni Diaz kauban ang iyang bana ug coach nga si Julius Naranjo.
Sumala ni Diaz, haom kaayo ang maong dula aron sa paghinumdom sa iyang makasaysayanong kadaugan sa Olympics. Tumong usab sa maong kompetisyon nga mapalapad ang kahibalo sa publiko bahin sa mga lagda sa weightlifting ug maghatag og dalan sa pagdiskobre sa mga bag-ong talentadong atleta.
Dugang ni Naranjo, bukas ang torneo sa tanang edad—gikan sa mga bata hangtod sa master category—aron mapakita nga ang weightlifting alang sa tanan ug makahimo ang Pilipinas og mga sangka nga nagsunod sa international standards.