Posibleng mobaliktad ang ilang testigo sa padayong imbestigasyon sa Senate Blue Ribbon Committee bahin sa alegasyon sa korapsyon sa flood control projects, sumala sa senadora nga si Imee Marcos.
Matod ni Marcos, posible nga mag-usab ang testimonya ni kanhi Philippine Marines Technical Sergeant Orly Regala Guteza sa pagpadayon sa imbestigasyon karong Biyernes. Si Guteza mao ang giingong “surprise witness” ni Senator Rodante Marcoleta ug miingon nga kaniadto siya Marine ug security consultant ni kanhi Congressman Elizaldy Co.
Gipahayag ni Guteza nga nagdala siya og mga maleta sa kwarta—nga gitawag og “basura”—sa mga balay ni Co ug sa kanhi Speaker Martin Romualdez, nga gihimakak usab ni Romualdez. Matod pa sa senadora, ang uban sa mga testigo gi-pugos ug gipanghadlok aron bawi-on ang ilang mga unang testimonya.
Bisan wala diretso nga gipangalanan, gihisgutan ni Marcos si Guteza nga usa sa mga testigong adunay “pinakamabug-at nga testimonya” sa isyu, ug kini mao ang rason sa intensibong pagpanghadlok kaniya. Gipahayag usab ni Sen Imee Marcos nga adunay uban pang testigo nga gipugngan sa pagbunyag ug dili gusto imbitahon sa pagdungog.
Wala niini gipadayag kinsa ang nagbuhat niini, apan giingon niya nga mogawas gihapon ang kamatuoran sa katapusan. Adunay impormasyon si Marcos nga ang iyang ig-agaw nga si kanhi House Speaker Martin Romualdez mao ang gilauman nga star witness, apan wala pa kini kasigurohan kung motambong ang kongresista sa imbestigasyon.