Giklaro sa Malacañang nga andam ang gobyerno sa posibleng grabeng epekto sa Super El Niño, ilabina sa suplay sa tubig, agrikultura ug uban pang importanteng serbisyo.
Matud ni Palace Press Officer Undersecretary Claire Castro, dili na bag-o sa nasud ang El Niño ug aduna nay mga programa ug ahensiya nga nagtinabangay aron mapamenos ang epekto niini.
Apil sa mga giandam sa gobyerno ang Task Force El Niño nga gilangkuban sa mga ahensiya sama sa DOST-PAGASA, Department of Agriculture, National Irrigation Administration, National Water Resources Board ug Department of Social Welfare and Development.
Gipahimangnoan usab sa Palasyo ang publiko batok sa pag-hoard sa tubig, ilabina sa bottled water, samtang giawhag ang mga panimalay nga magpraktis sa hustong pagtipig ug pagdaginot sa tubig.
Samtang, giandam usab sa gobyerno ang pondo alang sa mga mag-uuma ug mananagat nga mahimong maapektuhan sa El Niño.
Gipahayag sa Malacañang nga dili lamang ang gobyerno kondili ang publiko usab adunay dakong papel sa pagpangandam, ilabina sa pagdaginot sa tubig ug pag-atiman sa mga kalikupan.