Nag-atubang og kasong sabotahe sa ekonomiya ang mga responsable sa usa ka cold storage facility sa Valenzuela City human nadiskubre sa National Bureau of Investigation (NBI) ang P524 milyones nga kantidad sa gituohang kontrabando nga sibuyas.
Gipahayag ni NBI-National Capital Region (NBI-NCR) Director Emeterio Dongallo Jr. nga padayon ang ilang pagtukod sa kaso human gipagawas ang subpoena batok sa mga direktor ug managers sa maong pasilidad.
Sa imbestigasyon, gipangangkon sa mga opisyal sa pasilidad nga ang mga produkto gipanag-iya sa ilang mga tenant ug lokal nga mag-uuma, apan mga photocopy lang sa lease contract ang ilang napakita.
Matud ni Dongallo, walay lig-ong ebidensya ang NBI nga nagsumpay sa mga produkto ngadto sa lokal nga mag-uuma.
Gipadayag sa opisyal nga imposible alang sa lokal nga mag-uuma ang pag-produce og ingon ka dako nga volume sa sibuyas, usa ka klarong timailhan sa lapad nga hoarding aron manipulahon ang suplay ug presyo sa merkado.
Kining matang sa ilegal nga kalihokan dugay nang problema sa agrikultura sa Pilipinas, nga nagpahuyang sa ekonomiya ug nagdaot sa kabuhian sa mga mag-uuma.
Nagsugod ang operasyon niadtong Setyembre 29 human makadawat ang NBI-NCR og kasaligan nga impormasyon bahin sa daghang kontrabando nga produkto nga walay igong permit ug dugay nang gitipigan sa pasilidad.
Human sa duha ngadto sa tulo ka semana nga surveillance kauban ang Bureau of Customs (BOC), gipagawas ang Letter of Authority (LOA) niadtong Oktubre 16 ug gipatuman kini sa bodega pagkasunod adlaw, Oktubre 17.
Napakyas ang mga operator sa pagpakita og import documents sulod sa 15 ka adlaw.
Ubos sa Republic Act No. 12022, naila usab nga Anti-Agricultural Economic Sabotage Act, giisip nga sabotahe sa ekonomiya ang pagpuslit o pagtago sa mga produktong agrikultural nga nagkantidad og P10 milyones o labaw pa.
Kini nga balaod gipanday aron mapanalipdan ang sektor sa agrikultura sa nasud gikan sa mga ilegal nga kalihokan.
Ang silot niini naglakip sa tibuok kinabuhi nga pagkapriso ug multa nga lima ka pilo sa kantidad sa nakumpiskang produkto.

