Nagkinahanglan na lamang og tulo ka pirma aron makompleto ang partial committee report ug aron masaka na sa plenaryo sa Senate Blue Ribbon Committee kalabot sa giingong anomalya sa flood control projects, sumala kang Senate President Pro Tempore Panfilo “Ping” Lacson.
Lakip sa mipirma na sa maong report sila Senate President Vicente Sotto III, Committee Chair Sen. Lacson, Vice Chairman Sen. Erwin Tulfo, Sen. Bam Aquino, Sen. Risa Hontiveros, ug Sen. Kiko Pangilinan.
Bisan dili miyembro sa komite, gitugotan si Sotto nga mopirma isip ex-officio member.
Sumala ni Sen. Lacson, adunay duha pa ka senador nga nagpahayag nga mopirma sa report.
Aduna usab nga pipila ka miyembro nga nagduha-duha o mibawi sa ilang pirma tungod sa giingong paghangyo gikan sa ilang kanhing kauban sa majority bloc.
Bisan pa niini, gipasiugda ni Lacson nga dili niini pugson ang bisan kinsa, samtang andam usab si Senate President Sotto nga motabang aron makakuha og dugang suporta.
Una pa niini nagpadayag na si Sen. Imee Marcos nga dili kini mupirma sa partial committee report hangtod wala pay kinatikbuk-an nga imbestigasyon.
Kahinumduman nga gisuspinde ang pagdungog sa maong isyu gumikan sumala ni Lacson, walay pulos ang pagpadayon kung walay committee report ug supak kini sa mga lagda sa Senado.