Wala damha sa kampo sa depensa ang desisyon sa House prosecution panel nga dili na ipatestigo sila Office of the Vice President Chief of Staff Atty. Zuleika Lopez ug House Legislative Security Bureau Executive Director Capt. Belinda Belilio sa nagpadayon nga impeachment trial batok kang Vice President Sara Duterte.
Matud ni defense spokesperson Atty. Michael Wesley Poa, katungod sa prosekusyon ang maong desisyon ug wala sila misupak niini.
Samtang, wala usab makumpirma ni Poa kung motambong pa ba si Vice President Sara Duterte sa sunod nga mga pagdungog sa impeachment court. Matud niya, wala pa siyay kasayuran niini ug dili siya gustong mopahayag og sigurado aron malikayan ang paghatag og sayop nga impormasyon.
Kahinumduman nga gipahibalo sa House prosecution nga dili na nila ipresentar sila Lopez ug Belilio isip mga testigo tungod kay giisip nilang dili na kinahanglan ug mahimong balik-balik na lamang ang ilang testimonya.
Hinuon, ipadayon sa prosekusyon ang presentasyon sa ubang mga testigo ug ebidensya kalabot sa Article 4 sa Articles of Impeachment nga naghisgot sa giingong grave threat batok kang Presidente Ferdinand “Bongbong” Marcos Jr., First Lady Liza Araneta-Marcos ug kanhi House Speaker Martin Romualdez.