Balhog sa bilangguan ang duha ka indibidwal nga nagpayuhot og ginadiling druga human madakpan sa gilusad nga drug buy-bust operation sa mga operatiba didto sa Barangay Laturan, Libona, Bukidnon, niadtong Abril 24, 2026.
Giila ang mga suspetsado nga sila si alyas Chico, 36-anyos, ug alyas Along, kinsa parehong nalakip sa listahan sa Newly Identified Targets sa maong dapit.
Atol sa operasyon nga natigayon takna sa alas 3:23 sa kadlawon, narekober gikan sa posisyon sa mga dinakpan ang upat ka pakete sa gituohang shabu nga motimbang og 0.5 gramo ug adunay kantidad nga P4,080.Â
Nakuha usab sa kapulisan ang P1,000 nga buy-bust money lakip na ang usa ka unit sa cellphone nga gigamit sa transaksyon.
Ang mga suspetsado temporaryong nagtingkagol karon sa lock-up cell sa Libona Municipal Police Station samtang gihikay na ang pormal nga kasong paglapas sa Republic Act 9165 o ang Comprehensive Dangerous Drugs Act of 2002.