Kasamtangang nagpaalim sa balay tambalanan ang duha ka lalaki human kalit nga gi-atake sa usa ka suspek didto sa Purok 2, Barangay Pinamangguan, niadtong milabayng hapon, Abril 21. Sumala sa report gikan sa Bukidnon Police Provincial Office, ang mga biktima nga nag-edad og 61 ug 28 anyos malinawon lang nga nag-inom sa ilang panimalay sa dihang miagi ang 42-anyos nga suspek.
Sa maayong kabubut-on, giimbitar sa mga biktima ang suspek nga moapil kanila, apan sa wala pa mahibalong rason, kalit kining nasuko ug gihampak og kahoy ang ulo sa magulang nga biktima. Wala pa matagbaw, gidunggab usab sa suspek ang 28-anyos nga lalaki sa wala nga bahin sa tiyan gamit ang usa ka hunting knife.
Dali nga miresponde ang Kadingilan Municipal Police Station ug malampusong nadakpan ang suspek pinaagi sa usa ka hot pursuit operation. Narekober gikan kaniya ang kutsilyo nga gigamit sa krimen samtang gidala ang suspek sa buhatan sa kapulisan alang sa tukmang disposisyon sa kaso. Luwas na sa makuyawng kondisyon ang mga biktima samtang nagpadayon pa ang lawom nga imbestigasyon sa maong panghitabo.