Nakaangkon og mga samad sa abaga ang duha ka 44-anyos nga lalaki human gipangtigbas sa usa ka hubog nga lalaki samtang nag-imnanay sila uban sa ilang pamilya diha sa Purok 5, Barangay Mahayahay, lungsod sa Don Carlos, Bukidnon.
Subay sa imbestigasyon sa Don Carlos Municipal Police Station, miabot ang 45-anyos nga suspek nga ubos sa epekto sa ilimnong makahubog diin giimbitahan pa kini sa mga biktima nga mokaon. Mibalibad ang suspek ug nanamit nga mopauli, apan sa iyang pagbalik, nagdala na kini og sundang ug kalit nga nanigbas sa mga biktima.
Dali nga gidala ang duha sa Bukidnon Provincial Hospital sa Maramag diin luwas na sila sa peligro human natahian ang ilang mga samad. Padayon namag pahigayon og hot-pursuit operation ang mga kapolisan sa Don Carlos aron madakpan ang mitakas nga suspek.