Nagpagawas ang Department of Trade and Industry o DTI og bag-ong “Gabay sa Pamalit sa School Supplies” alang sa School Year 2026–2027 aron matabangan ang mga konsumidor sa pagtandi sa presyo samtang nangandam ang mga pamilya alang sa balik-eskwela.
Sumala sa DTI, tumong sa price guide nga maghatag og giya sa kasagarang palitonon sa eskwelahan sama sa notebooks, papel, lapis, bolpen, krayola, eraser, ug ruler ug uban pa.
Base sa advisory sa ahensya:
Notebooks (80 leaves): P13 hangtod P52
Spiral notebooks: P14 hangtod P49
Yarn notebooks: P14 hangtod P47
Grade pad paper: P13 hangtod P37 matag pad o pack
Intermediate pad paper: P22 hangtod P69.75 matag pad
Lapis: P12 hangtod P18 matag usa / P15 hangtod P24 matag pack
Bolpen: P3 hangtod P21 matag usa / P18 hangtod P27 matag pack
Krayola: P12 hangtod P114 matag kahon depende sa kolor
Pambura: P8 hangtod P20 matag usa
Pantasa: P16 hangtod P69
Ruler: P8 hangtod P32
Matod sa DTI, gipagawas ang maong giya aron matabangan ang publiko sa pagpili og abot-kayang school supplies samtang gisiguro gihapon ang kalidad ug hustong label sa mga produkto.
Gipahimangnoan usab sa ahensya ang mga konsumidor nga susihon pag-ayo ang labels ug detalye sa produkto aron masiguro nga luwas ug angay kini alang sa panginahanglan sa mga estudyante.