Giangkon sa usa ka 27-anyos nga truck helper ang pagdunggab sa iyang 33-anyos nga drayber gamit ang gitawag og “tare” o bulang sa manok sa Sitio Incalbog, Barangay Can-ayan, Malaybalay City, Bukidnon, niadtong milabay’ng adlaw.
Base sa imbestigasyon sa Malaybalay City Police Station, naghulat ang biktima ug ang iyang helper sulod sa ilang ten-wheeler truck nga adunay karga nga mga sako sa feeds samtang nagpaabot nga maablihan ang MM Poultry dihang kalit siyang giatake sa iyang kauban ug nawad-an og panimuot.
Gidala ang biktima sa Bukidnon Provincial Medical Center ug gibalhin sa Northern Mindanao Medical Center sa Cagayan de Oro City alang sa dugang pagpanambal.
Samtang, gidala usab sa ospital ang suspek human kini giingong giunay ang kaugalingon aron ipahilayo ang pagduda kaniya.
Gidakop kini sa kapulisan ug anaa karon sa hospital arrest samtang giandam ang angay nga kaso batok kaniya.

