Patay ang usa ka drayber sa motorsiklo human malambigit sa usa ka vehicular accident nga nahitabo sa Provincial Road sa Purok 10, Barangay Batangan, Valencia City, Bukidnon, atbang sa Barangay Hall.
Sumala sa inisyal nga imbestigasyon sa kapulisan, ang aksidente naglangkob sa usa ka Yamaha Sniper nga gimanehoan sa 34 anyos nga lalaki ug sa usa ka Bongo nga gimanehoan sa 42 anyos nga lalaki.
Matud pa paingon sa Barangay Sinayawan ang motorsiklo samtang ang Bongo nga sakyanan gikan sa kilid sa dalan ug paingon sa Barangay Poblacion, apan sa dihang misulod ang motorsiklo sa provincial road aron mag-U-turn, sa dihang kalit kining nabanggaan sa maong sakyanan.
Tungod sa impact, nakaangkon og grabe nga samad ang drayber sa motorsiklo ug gidala sa Adventist Medical Center, Valencia City, apan gideklar nga dead on arrival sa doktor.
Ang drayber sa Bongo ug ang duha ka sakyanan karon anaa na sa kustodiya sa Valencia City Police Station alang sa hustong disposisyon ug dugang nga imbestigasyon.