Target sa Department of Energy (DOE) nga mahatagan og award ang centralized auction alang sa mga mid-merit natural gas power plants sa ika-upat nga quarter sa 2026 isip kabahin sa paningkamot sa gobyerno nga mapalig-on ang suplay sa kuryente sa nasud.
Matud ni Energy Secretary Sharon Garin, nakigkoordinar na ang DOE sa nagkalain-laing ahensya sa gobyerno ug sa Independent Electricity Market Operator of the Philippines (IEMOP) aron mapahigayon ang bidding.
Tumong sa programa ang pagdasig sa pagtukod ug pagpalapad sa mga natural gas power plants nga mahimong gamiton sa mga higayon nga taas ang panginahanglan sa kuryente.
Gipasabot ni Garin nga mas paspas makatubag ang natural gas power plants sa pagtaas sa demand kumpara sa mga coal-fired power plants, busa makatabang kini sa pagpugong sa kakulang sa suplay sa kuryente ilabina sa oras sa taas nga konsumo.
Apan, iyang giila nga mas mahal ang paggamit sa natural gas kon itandi sa coal.
Gawas sa natural gas projects, gipaspasan usab sa DOE ang pagpatuman sa mga renewable energy projects.
Lakip niini ang Green Energy Auction 8 nga nagtutok sa mga proyekto sa Mindanao ug ang Green Energy Auction 9 nga alang sa mga solar-on-stilts ug agrisolar projects.