Giklaro ni Interior and Local Government Secretary Jonvic Remulla nga base sa mga nakuhang ebidensya ug CCTV footage, walay nahitabong pagpangatake sa sulod ug gawas sa building sa Senado niadtong Mayo 13. Sa usa ka press briefing sa Malacañang, gitataw ni Remulla nga sukwahi kini sa unang mga pamahayag nga nanggawas ug walay rason nga mabalaka ang publiko.
Gipasabot sa kalihim nga ang mga ahente sa NBI anaa ra sa tapad nga building sa GSIS aron mag-inspeksyon sa seguridad sa mga mamahaling art collections nunot sa gipahigayon nga prayer vigil sa mga sumusunod ni Senador Bato dela Rosa sa gawas.
Apan mitaas ang tensyon human nagmando si Acting Senate Sergeant-at-Arms Mao Aplasca sa iyang mga sakop nga mag-“lock and load” sa ilang mga armas. Gibutyag ni Remulla nga si Aplasca mismo ang unang nagpabuto og katulo ka higayon duol sa nahimutangan sa duha ka NBI agents, rason nga mibalos og “cover fire” ang mga ahente sa pagtuo nga sila ang giatake. Sa kasamtangan, nagpadayon ang lawom nga imbestigasyon kalabot sa maong insidente.