Gihimakak ni Senador Raffy Tulfo ang mga pasangil gikan sa majority bloc nga duna kunoy nanghasi ug nanghulga sa pipila ka mambabalaod aron makakuha og numero para mapatalsik si Senate President Alan Peter Cayetano. Matud ni Tulfo, walay kamatuoran ang maong isyu ug nagkahiusa ingon man malipayon ang ilang grupo sa minorya luyo sa mga hungihong nga duna silay giplano nga kudeta sa liderato sa Senado.
Gipatin-aw usab sa senador nga wala siyay bisan unsang kayugot human siya natangtang isip chairman sa Committee on Public Services. Gipasabot ni Tulfo nga normal ang maong dagan sa Senado ug iyang gidawat nga ang mayoriya gayud ang adunay gahom sa pagpili kung kinsa ang mangulo sa mga komite.
Kahinumduman nga una nang gibutyag ni Cayetano nga nagkapuliki ang minorya sa pagpanawag aron piliton ang pipila ka senador nga mobalhin og grupo sa wala pa nagtigom ang Senado isip usa ka impeachment court. Bisan pa man niini, gipahayag sa Senate President nga magpabili gihapon silang lig-on bisan pa man og nipis lang ang ilang labaw nga gilangkuban sa napulo’g-tulo (13) ka mga senador.