Mangayo og interbensyon ang Department of the Interior and Local Government o DILG sa Supreme Court ug Kongreso aron mapalig-on ang mga lakang batok sa mga insidente sa pagpamusil sa mga tunghaan, human sa nahitabong insidente sa Banga National High School sa South Cotabato.
Matud ni DILG Secretary Jonvic Remulla, gusto niya nga tugotan sa Korte Suprema ang Philippine National Police o PNP nga mag-inspeksyon sa mga panimalay sa mga kwalipikadong gun owner aron masiguro ang hustong pagtipig sa mga armas.
Gipadayag sa kalihim nga sa tulo ka insidente sa school shooting karong tuiga, mga rehistradong pusil nga gipanag-iya sa mga kawani sa gobyerno ang gigamit.
Tungod niini, iyang gipadayag nga kinahanglan adunay direktang responsibilidad ang mga gun owner sa hustong pag-atiman ug pagtipig sa ilang mga armas.