Wala naapektuhan ang morale sa House prosecution panel bisan nakadawat og show-cause order ang duha sa ilang mga miyembro gikan sa Senate Impeachment Court tungod sa posibleng paglapas sa sub judice rule.
Matud ni prosecution panel Deputy Spokesperson Atty. Hezekiah Montalan, nagkahiusa ang House panel sa pagsuporta kang Representative Terry Ridon ug Atty. Benjamin Tolosa Jr., kinsa gipangayoan og katin-awan may kalabotan sa ilang mga pamhayag sa media.
Nakapasa na usab og tubag ang duha ka prosecutor ngadto sa Impeachment Court.
Matud ni Montalan, dili nila isipon nga damaging ang maong show-cause order tungod kay gihatagan pa sila og higayon nga ipasabot ang ilang kampo.
Gitin-aw usab ni Montalan nga dili nila tan-awon ang show-cause order isip gag order, kundili kabahin sa pag-amping sa Impeachment Court aron mapreserbar ang pagka-impartial sa proceedings samtang nagpadayon ang impeachment trial.