Dako nga rollback sa presyo sa petrolyo lauman sunod semana

Gipahibalo ni President Ferdinand Marcos Jr. ang mas dako nga rollback o bawas sa presyo sa mga produktong petrolyo sa sunod semana.

Sa video nga gi-upload sa iyang Facebook account, gibutyag niini nga gilauman nga moabot sa ₱24.94 kada litro ang bawas sa diesel, ₱3.41 kada litro sa gasolina, ug ₱2.00 sa kerosene.

Mibalik usab og panawagan ang Pangulo sa mga oil companies nga ipatuman sa husto, kompleto, ug walay paglangan ang rollback sa presyo sa lana.

Dungan niini, gi-awhag niya ang publiko nga ireport sa Malacañang ug sa Department of Energy ang bisan unsang reklamo batok sa mga kompanya nga molapas sa kasamtangang polisiya sa oil price.