Gipaubos sa “lockdown” ug dinalian nga gipakatap ang daghang ihap sa mga otoridad ug sakop sa U.S. Secret Service sa palibot sa White House didto sa Washington, D.C. human makadawat og taho bahin sa nahitabong pagpamusil duol sa maong dapit.
Sumala sa taho, usa ka armadong lalaki ang giingong nikuot og armas gikan sa iyang bag ug nagpabuto sulod sa usa ka security checkpoint. Dinalian nga mibalos og pusil ang mga sakop sa Secret Service hinungdan nga naigo ug napatay ang maong suspek, samtang duna usab usa ka lumalabay o bystander ang naangol ug dinalian nga gidala sa ospital.
Tungod sa maong insidente, ang mga tigbalita ug mga trabahante sa White House ang gipapangita una og luwas nga dapit ug gipatago sa sulod sa press briefing room samtang gisusi pa sa Federal Bureau of Investigation (FBI) ug uban pang unit sa kapulisan ang tibuok palibot aron maseguro nga luwas na ang maong dapit.