Gipanghimakak sa kampo ni Senador Ronald “Bato” dela Rosa ang pamahayag sa National Bureau of Investigation (NBI) nga naghulagway kaniya isip “armado ug delikado,” ug giingong walay lig-on nga basehan ang maong alegasyon.
Sumala sa abogado ni Senador Bato dela Rosa nga si Atty. Israelito Torreon, dili makatarunganon ang maong paghulagway ug wala kini makatabang sa hustong pagsulbad sa mga legal nga isyu nga giatubang sa mambabalaod.
Matud niini nga si dela Rosa usa ka piniling opisyal nga naglihok nga malinawon ug nagsunod sa iyang katungdanan isip alagad sa katawhan.
Sa bahin sa NBI, gipasiugda sa ahensya nga kabahin lamang kini sa standard operational protocol sa mga operasyon batok sa mga indibidwal nga gipangita sa balaod.
Nanawagan usab ang kampo ni dela Rosa sa mga awtoridad nga magpakita og pasensya samtang gihulat pa ang desisyon sa Korte Suprema kalabot sa ilang gihangyo nga balihon ang naunang desisyon nga nagdumili sa interim relief.
Matud pa, si Senador dela Rosa nag-atubang og warrant gikan sa International Criminal Court human kini giila nga giingong co-perpetrator ni kanhi Rodrigo Duterte sa kampanya kontra ilegal nga droga sa miaging administrasyon.
Mibiya ang senador sa Senado niadtong Mayo 14 pipila ka oras human sa insidente sa pagpabuto sulod sa building, ug hangtod karon wala pa matultoli sa mga awtoridad ang gikahimutangan niini.