Gipasalig sa Department of Agriculture-Region X nga hugot ang ilang pagpangandam pinaagi sa pagsiguro nga aduna’y igong suplay alang sa mga mag-uuma. Matud ni Regional Executive Director Jose Apollo Pacamalan, gisiguro sa ahensya nga igo ang suplay sa agrikultura sa Northern Mindanao taliwa sa padayon nga pag-usbaw sa presyo lana diin aktibo nilang gi-reconfigure ug gisuportahan ang mga organisasyon sa mga mag-uuma aron mapalambo ang produksyon sa organic fertilizer sa rehiyon alang sa mabungahon nga ani.
Matud sa direktor, nagsugod na ang buhatan sa agrikultura sa pagpamalit og mga gamit sa produksyon sukad pa sa unang quarter sa tuig aron matabangan ang mga lokal nga mag-uuma taliwala sa padayong pagsaka sa presyo sa lana ug uban pang mga input gikan sa gawas sa nasud.
Sumala sa usa ka pamahayag niini, ang Northern Mindanao adunay kapasidad nga makagama og hangtod sa 200 ka tonelada nga organic fertilizer matag semana isip preparasyon sa bisan unsang krisis sa suplay.
Kini nga lakang gihimo aron mapanalipdan ang sektor sa agrikultura ug masiguro nga magpabiling stable ang suplay sa pagkaon bisan pa man sa hagit sa mahal nga presyo sa abono ug lana sa merkado.
Gipaambit usab sa direktor nga adunay hagit sa pag-apod-apod og ayuda ngadto sa mga mag-uuma alang sa angay nga makadawat niini busa gitun-an usab ang tukmang paagi aron makab-ot ang tinguha sa patas nga pagpanagtag og subsidiya.